விவசாயிகளுக்கு அரசு திட்டங்கள் சென்றடைவதில் சிக்கல்; 13ல் 6 வேளாண் உதவி இயக்குநர்கள் பணியிடம் காலி.
நமது நிருபர்-
விழுப்புரம் மாவட்டத்தில் 13ல் 6 வேளாண் உதவி இயக்குநர் பணியிடங்கள் காலியாக உள்ளதால் அரசு திட்டங்கள் விவசாயிகளுக்கு உடனடியாக கிடைப்பதில் சிக்கல் ஏற்பட்டுள்ளது. விழுப்புரம் மாவட்டத்தில், 75 சதவீதம் மக்கள் விவசாயம் மற்றும் விவசாயம் சார்ந்த தொழில்களை செய்து வருகின்றனர். மாவட்ட பொருளாதாரத்தின் மிக முக்கியமான பங்காக விவசாயம் விளங்குகிறது. இதில், 75 சதவீதம் குறு விவசாயிகள், 16 சதவீதம் சிறு விவசாயிகள் மற்றும் 9 சதவீதம் பிற விவசாயிகள் உள்ளனர்.மாவட்டத்தில் கோலியனுார், காணை, கண்டமங்கலம், விக்கிரவாண்டி, வானுார், ஒலக்கூர், மயிலம், மரக்காணம், செஞ்சி, வல்லம், மேல்மலையனுார், முகையூர், திருவெண்ணெய்நல்லுார் ஆகிய 13 வட்டாரங்களில் வேளாண் உதவி இயக்குநர் அலுவலகங்கள் செயல்பட்டு வருகிறது. இந்த வட்டாரங்களுக்கு தலா ஒரு வேளாண் உதவி இயக்குநர் பணியிடம் ஏற்படுத்தப்பட்டுள்ளது.ஒரு வட்டாரத்திற்கு, 30 ஆயிரம் விவசாயிகள் உள்ளனர். இதில், 25, ஆயிரம் விவசாயிகள் அந்தந்த வட்டார வேளாண் உதவி இயக்குநர் அலுவலகங்கள் மூலம் பயனடைந்து வருகின்றனர். இந்த அலுவலகங்கள் மூலம், விவசாயிகளுக்குத் தேவையான விதைகள், இடுபொருட்கள் பெற்று வழங்குவதோடு, அரசின் மானியம் மற்றும் மானியம் அல்லாத திட்டங்கள் செயல்படுத்தப்படுகிறது.மேலும், தங்கள் வட்டாரத்தில் இல்லாத விதைகள், இடுபொருட்களை மற்ற இடங்களில் இருந்தோ அல்லது மற்ற மாவட்டத்தில் இருந்தோ வேளாண் உதவி இயக்குநர்கள் பெற்று வழங்கி வருகின்றனர். அதுமட்டுமின்றி அந்த வட்டாரத்தில் உள்ள விவசாயிகளின் குறைகள் மற்றும் கோரிக்கைகளை கேட்டறிந்து பூர்த்தி செய்யும் பணியில் ஈடுபட்டு வருகின்றனர்.
மேலும், விவசாய அடையாள அட்டை வழங்குவது. அந்தந்த பகுதிகளில் உரக்கடைகளில் ஆய்வு செய்து, இருப்பு மற்றும் அதன் தரம் குறித்து பரிசோதனை செய்வது உள்ளிட்ட ஒரு வட்டாரத்தில் விவசாயம் சார்ந்த அனைத்து பணிகளையும் உதவி இயக்குநர்கள் கவனித்து வருகின்றனர்.இந்நிலையில், காணை, செஞ்சி, வல்லம், மேல்மலையனுார், ஒலக்கூர், மயிலம் ஆகிய 6 வட்டாரங்களில் வேளாண் உதவி இயக்குநர் பணியிடம் காலியாக உள்ளது.இதேபோன்று, மேல்மலையனுார், மரக்காணத்தில் வேளாண் அலுவலர் பணியிடம் காலியாக உள்ளது.
இந்த காலி பணியிடங்களுக்கு, மற்ற வட்டாரங்களில் பணிபுரியும் வேளாண் உதவி இயக்குநர்கள் கூடுதல் பொறுப்பு வகித்து வருகின்றனர்.இதனால், வேளாண் உதவி இயக்குநர்களுக்கு கூடுதல் பணிச்சுமை ஏற்படுவது மட்டுமின்றி, இரண்டு வட்டாரங்களிலும் அவர்கள் மேற்கொள்ளும் பணிகளில் தொய்வு ஏற்படுகிறது.அரசின் திட்டங்கள், இடுபொருட்கள், உபகரணங்கள் உள்ளிட்ட சலுகைகளை விவசாயிகள் பெறுவதற்கு, வேளாண் உதவி இயக்குநர்கள் சான்று வழங்க வேண்டும். உதவி இயக்குநர்கள் பணியிடம் காலியாக உள்ள 6 வட்டாரங்களிலும் அரசு திட்டங்கள், சலுகைகளை விவசாயிகள் பெறுவதில் சிக்கல் ஏற்பட்டுள்ளது. இது விவசாயிகளிடையே கடும் அதிருப்தியை ஏற்படுத்தியுள்ளது.மாவட்டத்தில் ஆண்டுதோறும் வடகிழக்கு பருவமழையின்போது, பயிர் சாகுபடியில் விவசாயிகள் தீவிரம் காட்டுவது வழக்கம். அதன்படி, தற்போது வடகிழக்கு பருவமழை துவங்க உள்ள நிலையில், பயிர் சாகுபடிக்கு விவசாயிகள் தயாராகி வருகின்றனர்.இந்த பருவத்திற்கு தேவையான விதைகள் மற்றும் அரசு மானியங்களைப் பெற மாவட்டத்தில் காலியாக வேளாண் உதவி இயக்குநர் மற்றும் வேளாண் அலுவலர்கள் பணியிடங்களை தமிழக அரசு உடனடியாக நிரப்ப வேண்டும் என விவசாயிகள், விவசாய சங்க பிரதிநிதிகள் கோரிக்கை விடுத்துள்ளனர்.