விழுப்புரம் மாவட்டத்தில் 5ஜி சேவை பி.எஸ்.என்.எல்., நடவடிக்கை எடுக்குமா?

தனியார் நிறுவனங்களின் போட்டியை சமாளிக்க பி.எஸ்.என். எல்; நிறுவனம் 5G சேவையை அறிமுகப்படுத்த வேண்டும் என வாடிக்கையாளர்கள் கோரிக்கை விடுத்துள்ளனர்.மத்திய அரசின் பொதுத்துறை தொலைத்தொடர்பு நிறுவனமான பி.எஸ்.என்.எல்., சார்பில் மாவட்டத்தின் பல்வேறு பகுதிகளில் மொபைல்போன் சேவை வழங்கப்பட்டு வருகிறது.தனியார் தொலைத்தொடர்பு நிறுவனங்கள் ஏற்கனவே 5ஜி சேவையை விரிவுபடுத்தி வரும் நிலையில், விழுப்புரம் மாவட்டம் முழுவதும் பி.எஸ்.என்.எல்., தனது வாடிக்கையாளர்களுக்கு தற்போது வரை 4ஜி சேவையை வழங்கி வருகிறது.தனியார் நிறுவனங்களின் 5ஜி சேவையில் அதிக வேகம், விரைவான இணைய இணைப்பு உள்ளிட்ட வசதிகள் கிடைப்பதால், பொதுமக்கள் அதனை பயன்படுத்துவதில் ஆர்வம் காட்டுகின்றனர். இதனால் பி.எஸ்.என்.எல்., வாடிக்கையாளர்களில் ஒரு பகுதியினர் தனியார் நிறுவனங்களின் சேவைக்கு மாறும் நிலை எதிர்காலத்தில் ஏற்படலாம்.குறிப்பாக இணையவழி கல்வி, வங்கி பரிவர்த்தனை, ஆன்லைன் அலுவல் பணிகள், வீடியோ அழைப்புகள், அரசு சேவைகளை பயன்படுத்துதல் உள்ளிட்டவற்றுக்கு அதிவேக 5G இணைய வசதி அவசியமாகியுள்ளது.4ஜி சேவையில் சில நேரம் வேகம் குறைவதால், முக்கியமான பணிகளில் நேர விரயம் ஏற்படும்.